مصنف: رینڈی ایلکورن  ( Author: Randy Alcorn )

مترجم: گوہر الماس    ( Translator: Gohar Almas )

میں ایک غیر ایماندار گھر میں پلا بڑھا اور میں پہلا تھا جس نے مسیح کے بارے میں نوعمری میں سنا۔ شروع میں تو بائبل کی کہانیاں مجھے یونانی افسانے اور مزاح نگار جو مجھے پسند تھے ان سے زیادہ سچی نہیں لگتی تھیں۔ پھر میں نے انجیل پڑھی اور ایمان لے آیا کہ یسوع حقیقی ہے اور سارے  سپر ہیروز یسوع کے مقابلے غیر حقیقی ہیں۔ جب یسوع نے مجھے نجات دی میں نے ایک گہری خوشی کا تجربہ کیا جس کے بارے میں میں پہلے کبھی نہیں جانتا تھا اور نہ ہی پہلے کبھی اس کا تجربہ کیا تھا۔

میری دلی خوشی نئے سرے سے پیدا ہونے، معاف کیے جانے، اور خُدا کی روح کے وسیلے سے زندہ رہنے کا نتیجہ تھی۔

'مُبارک ہے وہ جِس کی خطا بخشی گئی اور جِس کا گُناہ ڈھانکا گیا۔ ' زبور 32، آیت 1 

یہ "آپ کی نجات کی خوشی" (جس کا ذکر زبور 51، آیت 12 میں ہے) اس خالی پن سے بالکل الٹ ہے جو میں نے "خوشی کی خوشخبری" (جس کا ذکریسیعاہ باب 52، آیت 7  میں ہے) سننے سے پہلے محسوس کی تھی، جسے "بڑی شادمانی کی خوشخبری" بھی کہا جاتا ہے ( جس کا ذکرلوقا 2:10 میں ہے )۔

میں نے مسیح کی پیروی کرنے کے لیے جن چیزوں کو ترک کیا میں نے ان کو قربانی نہ سمجھا۔ خاص طور پر اس لیے کیونکہ ان سے مجھے خوشی نہیں ملتی تھی۔ یسوع اب میرے لیے سب کچھ سمجھتا تھا۔ میں خوش رہنے کی کوشش نہیں کر رہا تھا؛ میں واقعی خوش تھا.   

غمگین، پھر بھی ہمیشہ خوش رہنے والا  

مسیح کے پاس آنے والا ہر شخص اپنی خوشی میں اچانک اضافے کا تجربہ نہیں کرتا۔ بہت سے خوشی میں اچانک اضافے کا تجربہ کرتے بھی ہیں، لیکن ان میں سے بہت سے لوگ دیکھتے ہیں کہ ان کی خوشی آہستہ آہستہ وقت کے ساتھ کم ہوتی جاتی ہے۔

جب تک کہ مسیح اس دنیا کو بحال نہیں کرتا تب تک مسیح میں ہماری خوشی غم کے ساتھ جڑی رہتی ہے۔ کسی نہ کسی طرح دائمی خوشی دکھ میں بھی ممکن ہے۔

پھر بھی مسیحی "غم" میں ہمیشہ خوش رہتے ہیں"

 (2 کرنتھیوں باب 6، آیت 10)  

چند سال پہلے میرے ایک عزیز دوست نے خود کشی کرلی اور میں یہ سن کر اتنا رویا جتنا میں پچھلے کئ سالوں میں نہیں رویا۔ ایک لمحے میں، میری بیوی نینسی اور میں اس کی بیوہ کے ساتھ مل کر رو رہے تھے۔ پھر اچانک گٹار اور ڈرم بجنے کی آواز آئ اور کسی نے "ٹوئسٹ اینڈ شاٹ" گانا گایا۔ ہم تینوں کی آنکھیں کھلی کی کھلی رہ گئیں اور ہم اس عجیب بات پر ہنسنے لگے۔

وہ لمحہ ایک تحفے کی طرح تھا، ہنسی ہمارے بوجھل دلوں کو تسلی دے رہی تھی۔ اگلے تین دنوں میں اس طرح کے مزید لمحات آتے رہے جن سے ہم اس کی موت کی حقیقت کوسمجھ پاۓ ان میں قبر کے آس پاس کی خوفناک جگہ کا تجربہ اور امید سے بھری میموریل سروس میں گزرا وقت شامل تھا۔ موت کا بھیانک چہرہ ہم پرغالب نہیں آیا کیونکہ سارا خاندان ایک قادرمطلق، محبت کرنے والے اور خوش خُدا کی پرستش کرتا تھا جس نے دل دہلا دینے والے غم کے بیچ میں ہی ہمیں چھوٹی اور بڑی دونوں خوشیاں دیں۔ یسوع نے کہ " مُبارک ہو تُم جو اَب روتے ہو کیونکہ ہنسو گے۔ " لوقا باب 6، آیت 21

فردوس میں ملنے والی جس خوشی کا وعدہ ہم سے کیا گیا تھا وہ ہمیں کبھی کبھی حال میں بھی مل جاتی ہے لیکن ہم کبھی نہ ختم ہونے والی خوشی حاصل کرنے کے منتظر ہیں۔ 

مثبت سوچ اور خالص خوشی

مسیح میں روزانہ خوشی کا تجربہ کرنا خواہش مندانہ سوچ نہیں ہے۔ یہ ٹھوس حقائق پر مبنی ہے: خدا نے صلیب اور نئ زندگی کے ذریعے ہماری ابدی خوشی کو محفوظ کیا۔ وہ ہمارے اندر رہتا ہے، اور وہ ہماری شفاعت کرتا ہے۔ کوئی بھی چیز ہمیں اس کی محبت سے الگ نہیں کرسکتی۔

خدا کہتا ہے "خُوشی اور شادمانی کرکیونکہ خُداوند نے بڑے بڑے کام کِئے ہیں۔" یوایل باب 2، آیت 21

"مثبت سوچ" کہتی ہے کہ ہم منفی سوچ کو نظر انداز کر کے خوش رہ سکتے ہیں (جیسے کہ گناہ، مصیبت اور جہنم)۔ میں اس بات کو نہیں مانتا۔ میں اس خیالی انجیل کی خوشی پر یقین نہیں کرتا جس میں خدا صرف صحت، دولت اور کامیابی کے ذریعے ہی خوشی کا وعدہ کرتا ہے۔

جب خُدا ہمیں صحت، رزق اور خوشنما برکتیں عطا کرتا ہے تو ہمیں اسکا شکر گزار ہونا چاہیے۔ جب برکتیں ملتی ہیں تو خوش ہونا ایک چیز ہے لیکن دوسری چیز یہ ہے کہ جب برکتیں نہیں ملتیں تو یہ مانا جاۓ کہ خدا نے ہمیں ناپسند کیا ہے۔

ہمارے نزدیک خدا کے بندہ کو زیورات سے بھری ہوئ چیز کی طرح کی خوشحالی کو ظاہر نہیں کرنا چاہیے بلکہ اسے ایسا خادم بننا چاہیے جس کا مکمل دھیان صرف یسوع پر ہو ۔

مشنری ایمی کارمائیکل (1867–1951) جیسی خادمہ ہونا چاہیے جو ان گنت ان بچوں تک خوشخبری لے کر آئیں جنہیں انہوں نے ہندوستان کے مندر میں جسم فروشی سے بچایا۔ انہوں نے بہت زیادہ جسمانی تکالیف کا سامنا کیا اور پچپن سالوں میں انہوں نے چھٹی نہ کی۔ پھر بھی انہوں نے لکھا، "[زندگی] کے بارے میں کوئی خوفناک اور مشکوک بات نہیں ہے۔ اس کا مطلب مسلسل خوش رہنا ہے۔ . . . ہمیں خُداوند نے اس میں ایک  کامل خوشی کے لیے بلایا ہے اور اس کی خوشی ہمارا زور ہے‘‘ (فرینک ہوٹن، ایمی کارمائیکل)۔

جیسے خود غرض اور ظاہری محبت اور امن ہوتا ہے اسی طرح خود غرض اور ظاہری  خوشی بھی ہوتی ہے۔ 

حالات سے بڑی خوشی 

خوش رہنے کی جستجو عدن کی طرح قدیم بات ہے۔ لوگوں کے اندر خوشیوں کی پیاس باقی رہتی ہے۔ ہمارے معاشرے میں خاص طور پر نوجوانوں میں ذہنی دباؤ اوربے چینی میں اضافہ ہوتا جا رہا ہے۔ مطالعات سے یہ پتہ چلتا ہے کہ سوشل میڈیا استعمال کرنے کے بعد زیادہ لوگ اچھے کی بجاۓ زیادہ برا محسوس کرتے ہیں۔ اچھا وقت گزارتے ہوۓ دوسروں لوگوں کی تصوریں دیکھ کر وہ احساس محرومی اور احساس کمتری محسوس کرتے ہیں۔

تحقیق سے پتہ چلتا ہے کہ "لوگوں کی زندگی کے حالات اور وہ کتنے خوش ہیں ان دونوں کے درمیان بہت کم تعلق ہے" (خوشی ایک سنگین مسئلہ ہے، 115)۔

تحقیق سے پتہ چلتا ہے کہ "لوگوں کی زندگی کے حالات اور وہ کتنے خوش ہیں ان دونوں کے درمیان بہت کم تعلق ہے" (خوشی ایک سنگین مسئلہ ہے، 115)۔ پھر بھی جب لوگوں سے پوچھا جاتا ہے کہ "وہ خوش کیوں نہیں ہیں؟" تو وہ اپنے حالات پر دھیان کرتے ہیں. ہماری گمراہ کن دنیا میں پریشانیاں مستقل رہتی ہیں۔  خوش مزاج لوگ اپنے مشکل حالات سے ہٹ کر کسی ایسی ہستی کی طرف دھیان کرتے ہیں جس کے فضل سے اندھیروں میں روشنی آتی ہے اور انتہائی غیر متوقع لمحات میں ہمارے چہروں پر مسکراہٹ آتی ہے۔ بہت سے مسیحی اداسی، غصہ، پریشانی یا تنہائی میں رہتے ہیں، یہ سوچتے ہوئے کہ ان کے حالات کے وجہ سے وہ دکھی ہی رہیں گے۔ وہ ٹریفک جام ہونے، وائی فائی کے نہ چلنے، یا گیس کی بڑھتی ہوئی قیمتوں پر  خوشی سے محروم ہو جاتے ہیں۔ وہ کلام کے تقریباً ہر اس صفحے جس پر خوشی کی وجوہات موجود ہوتی ہیں ان پر غور نہیں کرتے ہیں۔  

ہم فردوس میں خوشی کا سانس لیں گے

اے ڈبلیو ٹوزر نے مسیح کی مصلوبیت کے بارے لکھی ایک کتاب میں لکھا "خدا کے لوگوں کو پوری دنیا میں سب سے زیادہ خوش لوگ رہنا چاہئے۔ لوگوں کو مسلسل ہمارے پاس آنا چاہیے اور ہماری خوشی اور مسرت کا ذریعہ پوچھنا چاہیے"۔ ایمی کارمائیکل کی "مستحکم خوشی" زندگی کی مشکلات کے باوجود مکن ہے۔ کمال اور دیرپا خوشی آج ہمارے پاس ہے کیونکہ مسیح یہاں ہے۔ یہ خوشی کل بھی ہمارے پاس ہوگی کیونکہ مسیح یہاں ہوگا اور یہ خوشی ہمیشہ کے لیے ہماری ہوگی کیونکہ مسیح ہمیں کبھی نہیں چھوڑے گا۔ 

وہ دن ابھی نہیں آیا جب خُدا ’’ان کی آنکھوں سے ہر آنسو پونچھ دے گا‘‘ (مکاشفہ باب 21، آیت 4)۔ وہ کرے گا. مسیح کے خون سے خریدا ہوا وعدہ ہماری موجودہ خوشی کے لیے خاص اہمیت رکھتا ہے۔ یسوع نے یہ چونکا دینے والی بات کی ”مبارک ہیں وہ جو ماتم کرتے ہیں۔ کیونکہ خدا انہیں تسلی دے گا” (متی باب 5، آیت 4)۔

موجودہ خوشی مستقبل کے آرام کے بارے وعدے سے ہی حاصل ہوتی ہے۔ خدا کے فرزندوں کا ابدی نقطہ نظر انہیں ایک حقیقی اور حتمی خوشی سے آگاہ کرتا ہے وہ خوشی جس کی وہ اب توقع کرسکتے ہیں۔ ( دیکھیں زبور 16، آیت 11 - زبور 21 آیت 6 -  زبور 36 ، 7 تا 10 - زبور 37 ، آیت 16 - زبور 43 ، آیت 4 -  زبور 73 ، آیت 28 - یوحنا باب 10 ، آیت 10 )

حال میں ابدیت کی خوشیاں کیوں نہیں ملتیں؟ کیا ہمیں آنے والی گریجویشن، شادی، ملاقات، دوبارہ ملاپ، یا چھٹیوں کی توقع میں موجودہ خوشی نہیں ملتی؟ تو کیا ہمیں اُس دن کی توقع کرنے میں اور بھی زیادہ خوشی نہیں ملنی چاہیے جب خُدا موت کو ہمیشہ کے لیے ختم کردے گا (یسعیاہ باب 25، آیت 8) اور ہمیشہ کے لیے لعنت کو پلٹ دے گا (مکاشفہ باب 22 ، آیت 3) اور ہم اپنے نجات دہندہ اور ابدی خاندان کے ساتھ جڑ جا ئینگے؟

خدا کے فضل کو مانگیں، آئیے آج اپنے خداوند کی خوشی میں داخل ہوں اس کے وعدے پر غور کرتے ہوئے اور اس بات کو دوسروں کو بتاتے ہوئے کہ ہم اس کے چہرے کو ایک نئی اور دلکش دنیا میں دیکھیں گے جہاں خوشی وہ ہوا ہوگی جس میں ہم سانس لینگے۔